Madan Mohan Danish
sitare jinki bahut dekh-bhal karte rahe
ham aisi saari shabon ko nihal karte rahe
hamare rah-numa bhi kamal karte rahe
javab dena tha un ko saval karte rahe
magar nadi ne suni hi nahin kinaron ki
ye aur baat ki vo arz-e-hal karte rahe
tamam raat miri niind mujh ko Dasti rahi
tamam ḳhvab miri dekh-bhal karte rahe
tamam umr tumhin mutma.in rahe ‘danish’
tamam umr tumhin the malal karte rahe
Leave a Reply