Rahat Hasan
bayan-e-hal ko arz-e-talab samajhte hain
vo log jin ka hai da.ava ki sab samajhte hain
sahih ho ke ghalat huun yahi ḳhata meri
ki main jo huun vo mujhe log kab samajhte hain
main jin ke vahm-o-guman ko farogh deta huun
mujhe haqir vo ḳhud ke sabab samajhte hain
tamam aib mujhi ko dikha.i dete hain
so mere dost mujhi ko ajab samajhte hain
sabaq hamen bhi mila hai koi zarur ki ham
jo kuchh na pahle samajhte the ab samajhte hain
zamin ho ḳhushk to faslen nahin uga kartin
is ek baat ko dariya ke lab samajhte hain
kisi ki zaat se vaqif koi nahin ‘rahat’
agarche sab yahan nam-o-nasab samajhte hain
Leave a Reply