ik aftab ka rang ek mahtab ka rang
mila ke Dhala gaya hai tire shabab ka rang
numayan jism hai aur shoḳh hai naqab ka rang
badal raha hai zamane men ab hijab ka rang
mili nazar jo miri daf.atan sar-e-mahfil
haya se ruḳh pe tere aa gaya gulab ka rang
nikal paḌe hain jo jugnu liye hue qindil
utar gaya hai tabhi se is aftab ka rang
suna hai taḳht larazte hain taaj hilte hain
jo ham ghazal men milate hain inqalab ka rang
saliqa ziist ko jiine ka ham ne sikha hai
saron pe jab se chaḌha hai teri kitab ka rang
vo pahle pahle se tevar hava hue dekho
uḌa uḌa sa hai kuchh din se ab janab ka rang
kisi ke sar pe chaḌha rang ‘mir’-o-‘ghalib’ ka
kisi ke sar pe chaḌhega kabhi ‘shahab’ ka rang
Leave a Reply