mujh sa betab yahan koi nahin mere siva
ya.ani barbad-e-jahan koi nahin mere siva
raushni thi to ka.i saa.e nazar aate the
tirgi hai to yahan koi nahin mere siva
bhiiḌ men ek taraf gosha-e-iḳhlas bhi hai
ghaur se dekh vahan koi nahin mere siva
shahr mere hi bharose pe ho ḳhufta jaise
hadaf-e-shor-e-sagan koi nahin mere siva
sar-bulandi miri tanha.i tak aa pahunchi hai
main vahan huun ki jahan koi nahin mere siva
sher men ghair ki tashbih kahan se aa.e
meri manind yahan koi nahin mere siva
chain likhta hai mire ḳhvab ka raavi ‘rashid’
is samundar men ravan koi nahin mere siva
Leave a Reply