jab koi zaḳhm mire dil pe naya lagta hai
tab mujhe hausla jiine ka hara lagta hai
ishq ke din the ki nafrat bhi bhali lagti thi
ab koi pyaar se dekhe to bura lagta hai
jaane kyon ab main kitaben bhi agar paḌhta huun
in men bhi tere hi hathon ka likha lagta hai
na mila jis ko har ik gaam pe DhunD aaya main
vo to mujh ko mire andar hi chhupa lagta hai
main to is shahr men jiita huun ki ‘irshad’ jahan
ḳhairiyat puchhne vaala bhi Dara lagta hai
Leave a Reply