Purnam Allahabadi
gesu ruḳh-e-raushan se vo Talne nahin dete
din hote hue dhuup nikalne nahin dete
anchal men chhupa lete hain sham-e-ruḳh-e-raushan
parvane to jal jaa.en vo jalne nahin dete
bikhra di vahin zulf zara ruḳh se jo sarki
kya raat Dhale raat vo Dhalne nahin dete
kis darja hain be-dard tire hijr ke sadme
dil ko tiri yadon se bahalne nahin dete
dekha hai jise bhi vo girate hain nazar se
chahe bhi sambhalna to sambhalne nahin dete
gulshan pe udasi ki faza dekh raha huun
vo dard ke mausam ko badalne nahin dete
be-rah na kyunkar hon bhala rah-rav-e-manzil
jab rah-numa raah pe chalne nahin dete
vo samne hote hain to hota hai ye aalam
arman machalte hain machalne nahin dete
Leave a Reply