Zuhoor Nazar
rakkha nahin ghurbat ne kisi ik ka bharam bhi
mai-ḳhana bhi viran hai kalisa bhi haram bhi
luuTa hai zamane ne mira besh bhi kam bhi
chhina tha tujhe chhin liya hai tira gham bhi
be-ab hua ab to mira dida-e-nam bhi
ai gardish-e-alam tu kisi moḌ pe tham bhi
sun ai but-e-jan-dar but-e-simbar ai sun
toḌe na ga.e ham se to patthar ke sanam bhi
main vasl ki bhi kar na saka shiddat-e-gham kam
aaya na kisi kaam tire hijr ka sam bhi
divar-e-sukun baiTh ga.i shiddat-e-nam se
barsa hai mire ghar pe agar abr-e-karam bhi
tanha.i na puchh apni ki saath ahl-e-junun ke
chalte hain faqat chand qadam raah ke ḳham bhi
sahra-e-gham-e-jan men bagulon se bacha kaun
miT ja.enge ai dost tire naqsh-e-qadam bhi
sunte hain chamakta hai vo chand ab bhi sar-e-bam
hasrat hai ki bas ek nazar dekh len ham bhi
Leave a Reply