apni ana se bar-sar-e-paikar main hi tha
sach bolne ki dhun thi sar-e-dar main hi tha
sazish rachi ga.i thi kuchh aisi mire ḳhilaf
har anjuman men ba.is-e-azar main hi tha
sau kartabon se zaḳhm laga.e ga.e mujhe
shayad ki apne ahd ka shahkar main hi tha
lamhon ki baz-gasht men sadiyon ki guunj thi
aur agahi ka mujrim-e-iz.har main hi tha
tahzib ki ragon se Tapakte lahu men tar
dahliz men paḌa hua aḳhbar main hi tha
‘ajmal’ safar men saath rahin yuun sa.ubaten
jaise ki har saza ka saza-var main hi tha
Leave a Reply