Kuchh Kar-E-Anasir Tah-E-Dariya Bhi Ajab Hai

kuchh kar-e-anasir tah-e-dariya bhi ajab hai

is ḳhaak men pinhan koi sho.ala bhi ajab hai

duniya se kuchh aisa bhi nahin rabt hamara

sunte hain magar lazzat-e-duniya bhi ajab hai

hai dil hi kisi arzu-e-vasl ka maskan

dil ka magar is raah pe aana bhi ajab hai

vo diid hai ab alam-e-maujud se aage

is sa.at-e-mas.ud ka dhoka bhi ajab hai

tai hoti chali jaati hai be-faiz masafat

is raah men divar ka aana bhi ajab hai

khilta nazar aata hi nahin hai gul-e-umid

jaata hi nahin dil se ye dhaḌka bhi ajab hai

is ziist pe sahra ka guman tak nahin hota

ai naḳhl-e-mohabbat tira saaya bhi ajab hai