ishq ki mayusiyon men soz-e-pinhan kuchh nahin
is hava men ye charagh-e-zer-e-daman kuchh nahin
kya hai dekho hasrat-e-sair-e-gulistan kuchh nahin
kuchh nahin ai sakinan-e-kunj-e-zindan kuchh nahin
ishq ki hai khud-numai ishq ki ashuftagi
ru-e-taban kuchh nahin zulf-e-pareshan kuchh nahin
yaad aa hi jaati hai aksar dil-e-barbad ki
yuun to sach hai chand zarrat-e-pareshan kuchh nahin
sach hai jo kuchh bhi hai vo hai garmi-e-bazar-e-husn
ahl-e-dil ka soz-e-pinhan kuchh nahin haan kuchh nahin
aur un ki zindagi hai aur unvan-e-hayat
khud-faramoshon ko tere ahd-o-paiman kuchh nahin
ek ho jaae na jab tak sarhad-e-hosh-o-junun
ek ho kar chak-e-daman-o-gareban kuchh nahin
jo na ho jaae vo kam hai jo bhi ho jaae bahut
kar-zar-e-ishq men dushvar-o-asan kuchh nahin
dekhni thi dekh li is chhed ki bhi sadgi
be-dilon men ye tabassum-ha-e-pinhan kuchh nahin
kaash apne dard se betab hote ai ‘firaq’
dusre ke hathon ye hal-e-pareshan kuchh nahin
Leave a Reply