Sheikh Ibrahim Zauq
rind-e-ḳharab-hal ko zahid na chheḌ tu
tujh ko para.i kya paḌi apni nabeḌ tu
naḳhun ḳhuda na de tujhe ai panja-e-junun
dega tamam aql ke baḳhiye udheḌ tu
is said-e-muztarib ko tahammul se zab.h kar
daman o astin na lahu men laTheḌ tu
chhuTta hai kaun mar ke giraftar-e-dam-e-zulf
turbat pe us ki jaal ka pa.ega peḌ tu
ai zahid-e-do-rang na piir aap ko bana
manind-e-sub.h-e-kazib abhi hai adheḌ tu
ye tangna.e-dahr nahin manzil-e-faragh
ghafil na paanv hirs ke phaila sukeḌ tu
ho qat.a naḳhl-e-ulfat agar phir bhi sabz ho
kya ho jo phenke jaḌ hi se us ko ukheḌ tu
jo soti bhiiḌ ba.is-e-ghaugha jaga.e phir
darvaza ghar ka us sag-e-duniya pe bheḌ tu
umr-e-ravan ka tausan-e-chalak is liye
tujh ko diya ki jald kare yaan se eḌ tu
avargi se ku-e-mohabbat ki haath uTha
ai ‘zauq’ ye uTha na sakega khakheḌ tu
Leave a Reply