dard-e-dil bhi kabhi lahu hoga
koi arman to sruḳh-ru hoga
aarzu koi bar na aa.egi
yahi anjam-e-arzu hoga
dekh kar mere dil ki barbadi
kaun shaida-e-rang-o-bu hoga
a.ine men hamen vo dekhenge
a.ina un ke ru-ba-ru hoga
ham na honge to ai gham-e-janan
kis ko yara-e-arzu hoga
kuchh to farma.en aap tum ya tu
kuchh to andaz-e-guftugu hoga
un ke andaza-e-karam ke liye
har nafas vaqf-e-arzu hoga
tab-e-nazzara-e-jamal kise
ek main hunga ek tu hoga
mere aate hi bazm saaqi men
sab ke lab par subu subu hoga
harf-e-matlab zaban pe kyuun aa.e
ye to iz.har-e-arzu hoga
manzilon se guzar ke bhi ‘sahir’
dil ka maqsud justuju hoga
Leave a Reply