apni na-karda-gunahi ka sila bhi rakh le
dil ke ḳhane men zara ḳhauf-e-ḳhuda bhi rakh le
tujh ko le ja.egi sannaTe men ik roz hayat
apne kanon ke liye sang-e-sada bhi rakh le
bujh na jaa.e kahin ehsas ke sho.alon ka mizaj
munjamid vaqt hai thoḌi si hava bhi rakh le
fasla aur baḌha degi ana ki dahliz
darmiyan zina-e-iḳhlas-e-vafa bhi rakh le
zindagi dasht-e-tilismat ki janib hai ravan
kuchh to hamrah buzurgon ki dua bhi rakh le
roz ka milna giran-bar-e-ta.alluq na bane
be-sabab us se kabhi ḳhud ko juda bhi rakh le
Leave a Reply