soz avaz men lahje men khanak hai saaqi
ishq ka tere yaqin to nahin shak hai saaqi
main ne kab tujh se kaha hai mujhe shak hai saaqi
tere mathe pe sitaron ki chamak hai saaqi
kya tiri shoḳhi-e-guftar ki tashrih karun
kitni shirini hai aur kaisa namak hai saaqi
ishq ke soz ne naghmat ko garmi baḳhshi
ab tire saaz men sho.alon ki lapak hai saaqi
mere sanson men jo bas jaa.e to kya us ka ilaaj
tu nahin paas magar teri mahak hai saaqi
main bahak ja.un to ye meri tunuk-zarfi hai
aur agar nashsha na ho kis ki hatak hai saaqi
dil-e-‘ehsas’ men jo ruh-e-tajalli hai nihan
chand taron men kahan us ki jhalak hai saaqi
Leave a Reply