Teri Rah Mein Rakh Kar Apni Sham Ki aahaT

terī raah meñ rakh kar apnī shaam kī aahaT

dam-ba-ḳhud sī baiThī hai mere baam kī aahaT

haath kī lakīroñ se kis tarah nikālūñ maiñ

terī yaad ke mausam, tere naam kī aahaT

jab ye dil rifāqat kī kachchī niiñd se jaagā

har taraf sunā.ī dī iḳhtitām kī aahaT

raat ke utarte hī dil kī suunī galiyoñ meñ

jaag uThtī hai phir se tere naam kī aahaT

baiTh jaatī hai aa kar dar pe kyuuñ mire, ‘nāhīd’

tere saath kī ḳhushbū, tere gaam kī aahaT

Leave a Comment