jo biit gai us ki khabar hai ki nahin hai
dekho mire tan par mira sar hai ki nahin hai
is shahr-e-nadamat se jo aae hain palat kar
dar-pesh naya un ko safar hai ki nahin hai
yaron ko bahut pyaar hai zindan-e-vafa se
lekin kisi divar men dar hai ki nahin hai
milti ho ziya jis ko charaghon ki lavon se
us shahr men aisa koi ghar hai ki nahin hai
chehre pe saja laaya huun main dil ki sadaen
duniya men koi ahl-e-nazar hai ki nahin hai
suraj ki guzargah bane shakh na jis ki
aisa koi raste men shajar hai ki nahin hai
barsat men koyal si jahan kuuk rahi thi
abad vo khvabon ka nagar hai ki nahin hai
tuuti hui masjid main khada dekh raha huun
mahfuz shivale ka gajar hai ki nahin hai
kyuun tera gareban hai ‘qatil’ ab bhi salamat
kuchh tujh pe nai rut ka asar hai ki nahin hai
Leave a Reply