Majrooh Sultanpuri
hamen shuur-e-junun hai ki jis chaman men rahe
nigah ban ke hasinon ki anjuman men rahe
tu ai bahar-e-gurezan kisi chaman men rahe
mire junun ki mahak tere pairahan men rahe
mujhe nahin kisi uslub-e-shairi ki talash
tiri nigah ka jaadu mire sukhan men rahe
na ham qafas men ruke misl-e-bu-e-gul sayyad
na ham misal-e-saba halqa-e-rasan men rahe
khule jo ham to kisi shokh ki nazar men khule
hue girah to kisi zulf ki shikan men rahe
sarishk rang na bakhshe to kyuun ho bar-e-mizha
lahu hina nahin banta to kyuun badan men rahe
hujum-e-dahr men badli na ham se vaz-e-khiram
giri kulah ham apne hi bankpan men rahe
ye hukm hai rahe mutthi men band sail-e-nasim
ye zid hai bahr-e-tapan kuza-e-kuhan men rahe
zaban hamari na samjha yahan koi ‘majruh’
ham ajnabi ki tarah apne hi vatan men rahe
Leave a Reply