dil ko bacha ke laa.e the saare jahan se ham
aḳhir men choT kha ga.e ik mehrban se ham
be-fikryon ka raaj ho rassa-kashi ke saath
vo madrasa hayat ka laa.en kahan se ham
ab gard bhi hamari na pa.enge qafile
aage nikal ga.e hain bahut karvan se ham
apna shumar hi nahin phulon men baagh ke
aise men kya ummid karen baghban se ham
‘jami’ vatan men apne musafir thi zindagi
london men bin-bula.e hue mehman se ham
Leave a Reply