kis ko bahlate ho shishe ka gulu TuuT gaya
ḳhum mire munh se laga de jo subu TuuT gaya
kiijo us zulf ko mashshat samajh kar shana
laakh dil TuuTe agar ek vo mu TuuT gaya
kuchh ḳhabar hai tujhe kahte hain tire zaḳhmi ka
aaj phir chaak ka siine ke rafu TuuT gaya
falak us dil-shikani ka to maza dekhega
koi dil gar kabhi ai arbada-ju TuuT gaya
thi muridon ke liye qalb ke sadme ki dalil
shaiḳh ka raqs men sam par jo vuzu TuuT gaya
dhyan us shishe ka rakhna ki na hoga paivand
dil miri jaan agar yak sar-e-mu TuuT gaya
us ḳhud-ara ke raha haath men nit a.ina
gham se a.ina-dil haa.e na tu TuuT gaya
mohtasib ne to ḳharabat men ki ḳhun-rezi
par sar-e-rind pe shab mai ka kadu TuuT gaya
dekhna tar-e-mohabbat ki hai mushkil phir sanTh
rishta-e-dosti ai ‘lutf’ kabhu TuuT gaya
Leave a Reply