Wajid Ali Shah Akhtar
ishq se kuchh kaam ne kuchh ku-e-janan se gharaz
gul se matlab hai na kuchh khar-e-bayaban se gharaz
ishq ki sarkar ko bebak bilkul kar chuke
ab na kuchh zanjir se matlab na zindan se gharaz
kis se ham jhagden nahin apna kisi millat men mel
ishq ke bande ko kya gabr-o-musalman se gharaz
alam-e-vahshat men uryani ka jaama chahiye
kaam hathon ko gareban se na daman se gharaz
teri nazron men na thahrega ye ru-e-aftab
tujh ko ai ‘akhtar’ na hogi mah-e-taban se gharaz
Leave a Reply