āsmāñ ātish-e-zulmāt meñ jal jaa.e to
ḳhanda-e-sub.h kī tasvīr badal jaa.e to
ab to ārām qayāmat pe huā hai mauqūf
aur ye āḳhirī ummīd bhī Tal jaa.e to
aks ā.īne meñ aur aks meñ ruup us kā hai
kabhī ye aa.ina āñkhoñ se badal jaa.e to
ye jo dam saadh ke baiThe haiñ use dekhne ko
pattharoñ kī bhī kahīñ aah nikal jaa.e to
ham se āvāra-e-ġhurbat se mohabbat na karo
kyā ho jo ret ye muTThī se nikal jaa.e to