faza men zulf ke jaadu agar bikhar jaate
hava ke saath bahut log dar-ba-dar jaate
bhala hua ki hui jins-e-gham ki arzani
ham apne daagh dikhane nagar nagar jaate
na jalta koi charagh-e-sada to sab sar-e-sham
lipaT ke apne gharon ke sutun se mar jaate
ik aisa lamha-e-sham-e-ḳhizan bhi guzra hai
mujhe jo dekhte is lamha tum to Dar jaate
hamen na rok ravan hain misal-e-para-e-abr
hamare bas men jo hota to ham Thahar jaate
‘musavvir’ aa ke na Thahra koi bhi ḳhvabon men
udaas raton ki ankhon men rang bhar jaate
Leave a Reply