yuun na piine men basar umr ki har shaam karo
shauq-e-rindi hai to saaqi se nazar aam karo
phir na a.enge nazar aise muqaddas chehre
jo baqa baḳhshen unhen duniya men vo kaam karo
hai kudurat se to phir bhiik se Thokar achchhi
apni badnami se achchha hai mira naam karo
but hain das biis magar chahne vaala dil ek
ek ik kar ke mohabbat se unhen raam karo
chheḌ do zikr kisi nargis-e-mastana ka
samne mere na tum zikr-e-mai-o-jam karo
tum ko fursat ho agar banne-sanvarne se nadim
ishq farmane se behtar hai ki aram karo
jaisa gum-sum hai ‘kanval’ choT hai gahri khaa.i
aaj tum us ko rula do to baḌa kaam karo
Leave a Reply