Swapnil Tiwari
mire ghar men na hogi raushni kya
nahin aaoge is janib kabhi kya
chahakti bolti ankhon men chuppi
unhen chubhne lagi meri kami kya
ḳhud us ka rang pichha kar rahe hain
kahin dekhi hai aisi sadgi kya
lipaTti hain mire pairon se lahren
mujhe pahchanti hai ye nadi kya
main is shab se to uktaya hua huun
sahar de pa.egi kuchh tazgi kya
tiri aahaT ki dhuup aati nahin hai
sama.at bhi miri kumhla ga.i kya
ḳhamoshi barf si ‘atish’ jami thi
nazar ki aanch se vo gal ga.i kya
Leave a Reply