Beena Goindi
un ki aamad se jo arman machal jaate hain
khud-bakhud raah ke asar badal jaate hain
ham to un logon men shamil hain hamara kya hai
jo umidon ke sahare hi bahal jaate hain
meri ankhon men tire hijr ke aansu hain jame
vo mire jazbon ki hiddat se pighal jaate hain
subh-e-sadiq ki tarah ujle hain jazbe un ke
jo bure vaqt men gir ke bhi sambhal jaate hain
aisa insan ki jis ka koi gham-khvar na ho
aise insan ko halat nigal jaate hain
meri ankhon se bhala khushk hon aansu kaise
kya kabhi chhod ke paani ko kanval jaate hain
Leave a Reply