kya mera iḳhtiyar zaman-o-makan par
pahre biTha diye hain kisi shai ne dhaan par
tujh se bichhaḌ ke ghar ki taraf lauTte hue
kyuun bastiyon ka vahm hua har chaTan par
hasrat rahi ki surat-e-ab-e-ravan chalen
kab se misal-e-sang paḌe hain Dhalan par
thi jin ki dastaras men hava pa-ba-gil hue
ai musht-e-ḳhak zo.am kahan ka uḌaan par
haan aarzu to dil men kabhi se hai zaḳhm ki
kya apna iḳhtiyar kisi ki kaman par
Dhalne lagi hai shaam mire ḳhak-dan ki ḳhair
shoa.la-fishan hui hai shafaq asman par
‘shahid’ tamam umr phira dar-ba-dar magar
dastak na de saka kabhi apne makan par
Leave a Reply