Amir Hamza Saqib
dasht-e-bala-e-shauq men ḳheme laga.e hain
ibn-e-ziyad-e-vaqt se kah do ham aa.e hain
ik kahkashan hi tanha nahin vaj.h-e-dil-kashi
anchal pe tere ham ne bhi moti luTa.e hain
tah kar chuke bisat-e-gham-o-fikr-e-rozgar
tab ḳhanqah-e-ishq-o-mohabbat men aa.e hain
tum hi nahin ilaj-e-mohabbat se be-niyaz
ham ne bhi ehtiyat ke purze uḌaa.e hain
lagta yahi hai nuur ke rath par savar huun
ankhon ne teri mujh ko vo raste sujha.e hain
vahshat-sara-e-dahr men bhi shad-kam hain
‘saqib’ ye log kaun se jangal se aa.e hain
Leave a Reply