Fulan Se Kaam Chalta Hai Fulan Se Kaam Chalta Hai

fulan se kaam chalta hai fulan se kaam chalta hai

chala.en vo jahan se bhi vahan se kaam chalta hai

kabhi bhule se kar lete hain un ka tazkira ham bhi

kabhi apna bhi yad-e-raftagan se kaam chalta hai

tumhari sha.iri jaisi bhi hai jo kuchh bhi hai lekin

tumhara sirf andaz-e-bayan se kaam chalta hai

tilavat aur tasbihat se aghaz karte hain

hamara sub.h ki pahli azaan se kaam chalta hai

idhar apni safon men bhi bahut se log hain us ke

vahan baiThe hue us ka yahan se kaam chalta hai

ye itne hashiya-bardar ham par kyon musallat hain

hamara to faqat ik hukmaran se kaam chalta hai

yaqin par ab hamen koi bharosa hi nahin ‘nami’

hamara aj-kal vahm-o-guman se kaam chalta hai