shab-e-visal tulua aftab kaise hua
zamin pe itna baḌa inqalab kaise hua
sitara mu-e-badan ruḳh gulab kaise hua
tumhara jism havas ki kitab kaise hua
labon se kaam burish ka liya gaya hoga
ki ang ang tira mehr-tab kaise hua
zarur laḌkiyan paani men tairti hongi
nahin to saara samundar sharab kaise hua
kahan se aa ga.e ḳhushiyon ke bavre panchhi
ki mujh pe band har ik gham ka baab kaise hua
ye kis ne chhin li bina.i asmanon se
zamin ke jism pe nazil azaab kaise hua
kisi ne yaad ke kankar zarur phenke hain
ḳhamosh jhiil men ye iztirab kaise hua
ise samajhne ko ik umr chahiye janan
‘munir’ asl men tera ḳharab kaise hua
Leave a Reply