Ghulam Husain Sajid
nigar-ḳhana-e-arz-o-sama mila ki nahin
agar mila to koi dilruba mila ki nahin
shikasta-dil ko zarurat hai khilkhilane ki
payam-e-gul se tujhe hausla mila ki nahin
siyah niind men jalte hue charaghon ko
kisi gali men koi jagta mila ki nahin
ruke hue to ruke hi rahenge ta-dam-e-marg
jo chal paḌe the unhen rasta mila ki nahin
kisi ko phuul khilate hue mire ghar men
koi damakta hua aa.ina mila ki nahin
shaguft-e-ḳhvab se bhigi hui in ankhon men
koi sitara mire kaam ka mila ki nahin
ghazal ko sab ke liye aa.ina banate hue
kisi pari se tira qafiya mila ki nahin
ruka tha aur kahan karvan-e-rahat-e-ishq
phir us ke ba.ad vo shirin-ada mila ki nahin
saval karte hain aksar mire adu ‘sajid’
ki is nagar men koi ashna mila ki nahin
Leave a Reply