Lafz Ho Pai Nahin Phir Bhi Maani Mein Hun Main

Rashmi Saba

lafz ho paa.i nahin phir bhi ma.ani men huun main

ya.ani kirdar nahin aur kahani men huun main

meri pahchan havalon hi se di jaati hai

sidha ik naam nahin hota hai ya.ani men huun main

mauj dariya ki tumhen saath liye chalti hai

aur udhar jhiil ke Thahre hue paani men huun main

manzilen gum hain qadam Thahre hue hain phir bhi

zindagi ko ye guman hai ki ravani men huun main

vo hai jangal to mujhe DhunDho parindon men ‘saba’

vo hai dariya to samajh jaao ki paani men huun main