Lafz Ho Pai Nahin Phir Bhi Maani Mein Hun Main

lafz ho paa.ī nahīñ phir bhī ma.ānī meñ huuñ maiñ

ya.anī kirdār nahīñ aur kahānī meñ huuñ maiñ

merī pahchān havāloñ hī se dī jaatī hai

sīdhā ik naam nahīñ hotā hai ya.anī meñ huuñ maiñ

mauj dariyā kī tumheñ saath liye chaltī hai

aur udhar jhiil ke Thahre hue paanī meñ huuñ maiñ

manzileñ gum haiñ qadam Thahre hue haiñ phir bhī

zindagī ko ye gumāñ hai kī ravānī meñ huuñ maiñ

vo hai jañgal to mujhe DhūñDho parindoñ meñ ‘sabā’

vo hai dariyā to samajh jaao ki paanī meñ huuñ maiñ

Leave a Comment