soz-e-darun ko aankh se bahar nikal kar
har shaḳh rakh rahi hai gul-e-tar nikal kar
laa.e husain aḳhiri lashkar nikal kar
ḳheme se tishna-lab ali asghar nikal kar
thoḌe hi din hai shaḳh-e-shajar par ye naghmagi
uḌ ja.enge ye log na.e par nikal kar
ahl-e-nazar ke samne rakhta huun dekh len
laaya huun musht-e-ḳhak se gauhar nikal kar
yuun bhi ho mujh ko chashm-e-fana DhunDhti phire
rakh duun main ruh-e-jism se bahar nikal kar
is dastan men aur to kuchh bhi naya nahin
us ke bichhaḌte vaqt ka manzar nikal kar
karta huun sajda aap main apne jamal ko
patthar se ik ḳhayal ka paikar nikal kar
ab sha.iri men aur kisi ko bhi den jagah
majzub-o-mast-o-faqr-o-qalandar nikal kar
shahron ki bud-o-bash ne vahshi kiya use
phirta hai qais haath men ḳhanjar nikal kar
Leave a Reply