jhankar ka rishta to hai zanjir se sa.in
kyon log pareshan hue ta.abir se sa.in
kuchh log abhi shahr men aise bhi hain ḳhush-posh
jo aag laga dete hain taqrir se sa.in
haq bolne ka hausla ab ham men nahin hai
nisbat to nikalti rahi shabbir se sa.in
tadbir pe mauquf hai duniya ki hukumat
ham log ulajhte rahe taqdir se sa.in
rahne do abhi a.ina-ḳhane men koi aks
kuchh dil to bahal jaata hai tasvir se sa.in
pahle hi bahut der hui aane men un ke
ab jaan nikal ja.egi taḳhir se sa.in
tadbir kuchh aisi karo ulfat ke nigahban
bichhḌe na koi ranjha kisi hiir se sa.in
Leave a Reply