fauziya-rabab

Tum Ho Meri Zist Ka Hasil Shahzade

tum ho meri ziist ka hasil shahzade

tod na dena tum mera dil shahzade

apne andar tum ko dekh rahi huun main

aina hai mere muqabil shahzade

sim-o-zar par itrate the dekho ab

ishq nagar men ban gae saail shahzade

shahzadi ne dil haara aur jiiti jang

mal-e-ghanimat men tum shamil shahzade

vasl ki rut ka ab to istiqbal karo

kuuk rahi hai baagh men koyal shahzade

shahzade ye duniya fikr men ghaltan hai

jab se main huun tum par maail shahzade

Dagar Dagar main bhatak rahi huun aaj talak

tujh se bichhad kar kaisi manzil shahzade

ik janib tu dusri janib teri ‘rabab’

ek zamana beach men haail shahzade

More Poems

Leave a Comment