ik sail-e-be-panah ki surat ravan hai vaqt
tinke samajh rahe hain ki vahm-o-guman hai vaqt
parkho to jaise tegh-e-do-dam hai khinchi hui
taalo to ek udta hua sa dhuan hai vaqt
jo dil hadaf hua ho vo shayad bata sake
navak bhi aap aap hi chadhti kaman hai vaqt
ham us ke saath hain ki vo hai apne saath saath
kis ko khabar ki ham hain ravan ya ravan hai vaqt
tarikh kya hai vaqt ke qadmon ki gard hai
qaumon ke auj-o-past ki ik dastan hai vaqt
agle sukhan-varon ne jise asman kaha
sach puchhiye to aaj vahi asman hai vaqt
hamdam nahin rafiq nahin ham-nava nahin
lekin hamara sab se bada razdan hai vaqt
kal kaenat apne jilau men liye hue
‘javed’ hast-o-bud ka ik karvan hai vaqt
Leave a Reply