phir aai fasl-e-gul phir zakhm-e-dil rah rah ke pakte hain
magar dagh-e-jigar par surat-e-lala lahakte hain
nasihat hai abas naseh bayan nahaq hi bakte hain
jo bahke dukht-e-raz se hain vo kab in se bahakte hain
koi ja kar kaho ye akhiri paigham us but se
are aa ja abhi dam tan men baaqi hai sisakte hain
na bosa lene dete hain na lagte hain gale mere
abhi kam-umr hain har baat par mujh se jhijakte hain
vo ghairon ko ada se qatl jab bebak karte hain
to us ki tegh ko ham aah kis hairat se takte hain
uda laae ho ye tarz-e-sukhan kis se batao to
dam-e-taqdir goya baagh men bulbul chahakte hain
‘rasa’ ki hai talash-e-yar men ye dasht-paimai
ki misl-e-shisha mere paanv ke chhale jhalakte hain
Leave a Reply