Sannata Tufan Se Siwa Ho Ye Bhi To Ho Sakta Hai

Sufi

sannaTa tufan se siva ho ye bhi to ho sakta hai

ye kuchh aur baḌa dhoka ho ye bhi to ho sakta hai

zabt-e-junun se andazon par dar to band nahin hote

tu mujh se baḌh kar rusva ho ye bhi to ho sakta hai

rahne de ye harf-e-tasalli meri himmat past na kar

nakami hi men rasta ho ye bhi to ho sakta hai

dhundne vaala dhund raha hai aur andaz jafaon ke

mujh ko vafa ka zaḳhm laga ho ye bhi to ho sakta hai

laao ik lamhe ko apne-ap men duub ke dekh aa.uun

ḳhud mujh men hi mera ḳhuda ho ye bhi to ho sakta hai

mujh ko to ye e.azaz bahut hai lekin teri tamanna ne

mere labon se kaam liya ho ye bhi to ho sakta hai

aḳhir apne qadmon ko kyuun ham mulzim Thahrate hain

rahon ne munh moḌ liya ho ye bhi to ho sakta hai

mere tasavvur ne baḳhshi hai tanhai ko bhi ik mahfil

tu mahfil mahfil tanha ho ye bhi to ho sakta hai