zindan-nasib huun mire qaabu men sar nahin
mera sujud un ke liye mo’atabar nahin
kya hai fareb nargas-e-ghammaz agar nahin
be-vaj.h tu kashakash-e-qalb-o-jigar nahin
taqsim-e-gul pe bahs anadil men chhiḌ ga.i
gulzar luT raha hai kuchh us ki ḳhabar nahin
lazzat-shanas-e-gham ko hai iz.har-e-gham haram
rota huun aur daman-e-mizhgan bhi tar nahin
mere sujud-e-shauq se ho jaa.e be-niyaz
itna buland hausla-e-sang-e-dar nahin
yuun baghban ne himmat-e-parvaz chhin li
aisi bhari bahar hai aur ek par nahin
tahsin-e-na-shanas ka bhuka nahin ‘suhail’
main abru-farosh-e-mata-e-hunar nahin
Leave a Reply