shaguftagi se ga.e, dil-giraftagi se ga.e
ham aaj ḳhalvat-e-jan men bhi be-dili se ga.e
gila karen bhi to kis se vo na-murad-e-junun
jo ḳhud zaval ki janib baḌi ḳhushi se ga.e
suna hai ahl-e-ḳhirad ka hai daur-e-a.inda
ye baat hai to samajh lo ki ham abhi se ga.e
ḳhuda kare na kabhi mil sake davam-e-visal
jiyenge ḳhaak agar tere ḳhvab hi se ga.e
hai ye bhi ḳhauf hamen be-tavajjohi se siva
ki jis nazar se tavaqqo.a hai gir usi se ga.e
maqam kis ka kahan hai, buland kis se hai kaun?
miyan ye fikr karoge to sha.iri se ga.e
har ek dar pe jabin Tekte ye sajda-guzar
ḳhuda ki khoj men nikle the aur ḳhudi se ga.e
samajhte kyuun nahin ye sha.er-e-karaḳht-nava
suḳhan kahan ka jo lahje ki dilkashi se ga.e
gali thi sahn ka hissa hamare bachpan men
makan baḌe hue lekin kushadgi se ga.e
bara.e ahl-e-jahan laakh kaj-kulah the ham
ga.e harim-e-suḳhan men to ajizi se ga.e
ye tez raushni raton ka husn kha ga.i hai
tumhare shahr men ham apni chandni se ga.e
faqih-e-shahr ki har baat maan lo chup-chap
agar saval uThaya, to zindagi se ga.e
na puchhiye ki vo kis karb se guzarte hain
jo agahi ke sabab aish-e-bandagi se ga.e
uThao raḳht-e-safar, aao ab chalo ‘irfan’
hasin yahan ke to sab ḳhu-e-dilbari se ga.e
Leave a Reply