suniye payam-e-shams-o-qamar raqs kijiye
is da.ere men sham-o-sahar raqs kijiye
pakizgi faza ki tarannum nasim ka
kya chandni hai pichhle pahar raqs kijiye
taali baja rahe hain shagufe na.e na.e
avaz de rahe hain shajar raqs kijiye
kya chhup-chhupa ke chhat ke tale naach men maza
uryan nikal ke dar se badar raqs kijiye
ji chahta hai aaj farishton se bhi kahun
parvaz kya hai khinch ke par raqs kijiye
fursat nahin faqih ko zar ki talash se
mutlaq na kiije ḳhauf-o-ḳhatar raqs kijiye
gar iztirar qabil-e-tazir hai to ho
hai apne bas men ḳhair na shar raqs kijiye
dozaḳh jala ke dard ka aur agahi ki aag
donon ke darmiyan utar raqs kijiye
tanha.iyon ke giit na sab ko suna.iye
paanv mila ke joḌ ke sar raqs kijiye
mat puchhiye ki pyaar ka anjam kya hua
pyara chala gaya hai kidhar raqs kijiye
manind-e-qais ret na sahra ki chhaniye
kis ko mili hai kis ki ḳhabar raqs kijiye
kiije tavaf-e-kucha-e-janan ko tez-tar
muzmar hai is men sair-o-safar raqs kijiye
‘sayyad’ qarar ko to paḌi hai tamam umr
ik aur bhi ghazal hai agar raqs kijiye
Leave a Reply