Suniye Payam-E-Shams-O-Qamar Raqs Kijiye

suniye payām-e-shams-o-qamar raqs kījiye

is dā.ere meñ shām-o-sahar raqs kījiye

pākīzgī fazā kī tarannum nasīm kā

kyā chāñdnī hai pichhle pahar raqs kījiye

taalī bajā rahe haiñ shagūfe na.e na.e

āvāz de rahe haiñ shajar raqs kījiye

kyā chhup-chhupā ke chhat ke tale naach meñ mazā

uryāñ nikal ke dar se badar raqs kījiye

jī chāhtā hai aaj farishtoñ se bhī kahūñ

parvāz kyā hai khīñch ke par raqs kījiye

fursat nahīñ faqīh ko zar kī talāsh se

mutlaq na kiije ḳhauf-o-ḳhatar raqs kījiye

gar iztirār qābil-e-tāzīr hai to ho

hai apne bas meñ ḳhair na shar raqs kījiye

dozaḳh jalā ke dard kā aur āgahī kī aag

donoñ ke darmiyān utar raqs kījiye

tanhā.iyoñ ke giit na sab ko sunā.iye

paañv milā ke joḌ ke sar raqs kījiye

mat pūchhiye ki pyaar kā anjām kyā huā

pyārā chalā gayā hai kidhar raqs kījiye

mānind-e-qais ret na sahrā kī chhāniye

kis ko milī hai kis kī ḳhabar raqs kījiye

kiije tavāf-e-kūcha-e-jānāñ ko tez-tar

muzmar hai is meñ sair-o-safar raqs kījiye

‘sayyad’ qarār ko to paḌī hai tamām umr

ik aur bhī ġhazal hai agar raqs kījiye

Leave a Comment