is chand se chehre ko dikha kyuun nahin dete
hasrat ye mire dil ki miTa kyuun nahin dete
ḳhalvat men to kahte ho ki tum jaan ho meri
ye baat zamane ko bata kyuun nahin dete
ye baat agar sach hai ki tum pir-e-mughan ho
is rind ko ji bhar ke pila kyuun nahin dete
maqsud nahin nasl ki islah agar ho
aslaf ke ausaf bata kyuun nahin dete
aḳhlaq se kirdar se ulfat se jahan men
nafrat ke andheron ko miTa kyuun nahin dete
main ho ke vafadar bhi mulzim huun jafa ka
phir meri vafaon ko bhula kyuun nahin dete
nafrat ke ghaTa-Top andhere men ‘zaki’ tum
ik sham.a mohabbat ki jila kyon nahin dete
Leave a Reply