shahr-e-ulfat men diya koi jalate jaate
mere kuche ke andhere bhi miTate jaate
ye mira ishq hai kamzori nahin hai janan
sar jhukati huun sar-e-rah jo aate jaate
ye jo palkon pe sajo.e hue hain moti ham
ye to daulat hai ise kaise luTate jaate
aap ko dil pe mire raaj agar karna tha
vasvase pahle mire dil ke miTate jaate
zinda rahne ke liye ḳhvab zaruri hai bahut
so hamen ḳhvab naya koi dikhate jaate
be-qarari ki ye manzil nahin hoti ‘jyoti’
duriyan aap agar mujh se baḌhate jaate
Leave a Reply