Mohsin Ehsan
main ek umr ke ba.ad aaj ḳhud ko samjha huun
agar rukun to kinara chalun to dariya huun
jo lab-kusha huun to hangama-e-bahar huun main
agar ḳhamosh rahun to sukut-e-sahra huun
tujhe ḳhabar bhi hai kuchh ai masarraton ke naqib
main kab se saya-e-divar-e-gham men baiTha huun
jhulas ga.i hai hava-e-dayar-e-dard mujhe
bas ek pal ke liye shahr-e-gham men Thahra huun
miri ḳhudi men nihan hai mire ḳhuda ka vajud
ḳhuda ko bhuul gaya jab se ḳhud ko samjha huun
main apne paanv ka kanTa main apne gham ka asiir
misal-e-sang-e-garan raste men baiTha huun
bulandiyon se miri samt dekhne vaale
mire qarib to aa main bhi ek duniya huun
agar hai maqtal janan ka ruḳh to ai ‘mohsin’
zara Thahar ki tire saath main bhi chalta huun
Leave a Reply