Main Ek Umr Ke Baad Aaj KHud Ko Samjha Hun

maiñ ek umr ke ba.ad aaj ḳhud ko samjhā huuñ

agar rukūñ to kinārā chalūñ to dariyā huuñ

jo lab-kushā huuñ to hañgāma-e-bahār huuñ maiñ

agar ḳhamosh rahūñ to sukūt-e-sahrā huuñ

tujhe ḳhabar bhī hai kuchh ai masarratoñ ke naqīb

maiñ kab se sāya-e-dīvār-e-ġham meñ baiThā huuñ

jhulas ga.ī hai havā-e-dayār-e-dard mujhe

bas ek pal ke liye shahr-e-ġham meñ Thahrā huuñ

mirī ḳhudī meñ nihāñ hai mire ḳhudā kā vajūd

ḳhudā ko bhuul gayā jab se ḳhud ko samjhā huuñ

maiñ apne paañv kā kāñTā maiñ apne ġham kā asiir

misāl-e-sañg-e-garāñ rāste meñ baiThā huuñ

bulandiyoñ se mirī samt dekhne vaale

mire qarīb to aa maiñ bhī ek duniyā huuñ

agar hai maqtal jānāñ kā ruḳh to ai ‘mohsin’

zarā Thahar ki tire saath maiñ bhī chaltā huuñ

Leave a Comment