Fasad Har Jagah Barpa Hai Kya Kiya Jae

Rauf Raheem

fasad har jagah barpa hai kya kiya jaa.e

mizaj-e-qaum hi aisa hai kya kiya jaa.e

jo maz.habi the masa.il vo ab siyasi hain

yahin to daal men kaala hai kya kiya jaa.e

udhar piite the ghalib to ye churata hai

chacha se aage bhatija hai kya kiya jaa.e

ham apni naak khujane se ho ga.e qasir

hamare samne nakTa hai kya kiya jaa.e

hai ḳhud-kushi hi ab anjam ishq-bazi ka

hamare ḳhvab men rekha hai kya kiya jaa.e

adu ke ghunse hain to mar-piT salon ki

yahi to ishq men hota hai kya kiya jaa.e

purana shahr hai badnam qatl-o-ḳhun ke liye

magar isi men to jiina hai kya kiya jaa.e

har ek sher hamara hai tanz ka nashtar

hamara lahja hi tikha hai kya kiya jaa.e

Dhaka chhupa nahin farhad-o-qais ka anjam

‘rahim’ aql ka andha hai kya kiya jaa.e