main hijr-zad huun mujhe sahra dikha.i de
tu aankh bhar ke dekhe to dariya dikha.i de
aisa tilism-saz hai gar phunk maar de
saara jahan aankh ko andha dikha.i de
ye ehtimam qatl ka kuchh is tarah se ho
maqtal ka rasta mujhe sasta dikha.i de
us ko hi diin maan lo yuun bahs mat karo
jo bhi nabi ki pusht pe baiTha dikha.i de
is ko ḳhizan ke daur men baghi samajh ke chuum
jo bhi shajar pe aḳhiri patta dikha.i de
yuun ban sanvar ke mil mujhe kuchh to ḳhayal kar
aisa dikha.i de mujhe vaisa dikha.i de
Leave a Reply