dil ke zakhmon ki chubhan dida-e-tar se puchho
mere ashkon ka hai kya mol guhar se puchho
ghar jala baithe charaghon ki havas men akhir
ghar ki qimat to kisi khak-basar se puchho
ye to maalum hai main samt-e-safar kho baithi
tum isi baat ko andaz-e-digar se puchho
ret udti hai sujhai nahin deta kuchh bhi
kat sakegi kabhi ye raat sahar se puchho
yuun to majnun bhi hua kohkan o mansur hue
ghayal ab kaun hua tir-e-nazar se puchho
log kahte hain mujhe sang-e-sar-e-rah ‘bushra’
qadr-o-qimat miri kuchh ahl-e-hunar se puchho
Leave a Reply