KHud Ko Hum Yun Tabah Kar Lenge

ḳhud ko ham yuuñ tabāh kar leñge

ḳhūbsūrat gunāh kar leñge

tum na mil paa.e koī baat nahīñ

ranj-o-ġham se nibāh kar leñge

bandisheñ toḌ kar zamāne kī

ham mohabbat kī raah kar leñge

us kī āñkhoñ meñ Dūbne ke liye

apne dil se salāh kar leñge

saarī duniyā se ho ke be-parvā

us kī jānib nigāh kar leñge

ham ne aisā kabhī na sochā thā

ishq ham be-panāh kar leñge

Leave a Comment