halat ke kohna dar-o-divar se niklen
duniya ko badalna hai to ghar-bar se niklen
nakam sadaon ke hain aaseb yahan par
is dasht-e-tamanna se to raftar se niklen
jin men ho mohabbat ka uḳhuvvat ka ishara
paigham kuchh aise bhi to aḳhbar se niklen
duniya bhi to ban sakti hai jannat ka namuna
ham apni ana apne hi pindar se niklen
jo haqq-o-sadaqat ka sabaq bhuul ga.e hain
vo kaise bhala vaqt ke azar se niklen
ham ne bhi baharon ko lahu apna diya hai
ab ham se hi kahte ho ki gulzar se niklen
is darja taghaful hai to ham ne bhi ye socha
ummid-e-karam hasrat-e-didar se niklen
har ek qadam par hai yahan jaan ka ḳhatra
ab soch samajh kar zara bazar se niklen
aage hi nikalna hai jo ‘shayan’ se un ko
aḳhlaq se a.amal se kirdar se niklen
Leave a Reply