Jo Teri Yaadon Se Is Dil Ka Aaftab Mile

jo terī yādoñ se is dil kā āftāb mile

to merī āñkhoñ ko dariyāoñ kā ḳhitāb mile

mire makān-e-tamannā kī sīḌhiyoñ pe kabhī

tirā shabāb mujhe sūrat-e-gulāb mile

kiran kī nokeñ chubhīñ tan meñ tab huā ehsās

ki ḳhanjaroñ kī tarah mujh se āftāb mile

tumhārī āñkhoñ ke in nīm-vā darīchoñ meñ

azāb-e-dīd kī sūrat shikasta ḳhvāb mile

gunāh ek hī donoñ kā hai to phir ye kyuuñ

use savāb mile aur mujhe azaab mile

mirā salām ġharīb-ul-vatan se kah denā

kabhī jo dasht meñ nezoñ pe āftāb mile

Leave a Comment