Jis Bhi Lafz Pe Ungliyan Rakh De Saz Kare

jis bhī lafz pe uñgliyāñ rakh de saaz kare

nazm kī marzī kaise bhī āġhāz kare

kaun lagā.e qadġhan ḳhvāb meñ ashiyā par

aa.ina haath milā.e aks āvāz kare

jab bachchoñ ko dekhtā huuñ to sochtā huuñ

mālik in phūloñ kī umr darāz kare

sote jāgte kuchh bhī boltā rahtā huuñ

kaun bhalā mujh aise ko hamrāz kare

qadam qadam par in kī zarūrat paḌtī hai

aañkh se kahnā aañsū pas-andāz kare

Leave a Comment